NadoO Heart

اسمي : ندى ,,

تاريخ ميلادي : 26-10-1405هـ – 15-7-1985م ,,

برجي : السرطان ,,

أعيش في جدة عروس البحر الأحمر ,,

أنا أكبر وحدة في أخواني ,,

وبصراحة مرررة مو لايق عليا إني أكون الكبيرة ,,

ودايما أقول لأخواتي أنا متنازلة عن المنصب دا ,,

اللي تبغى تصير الكبيرة بدالي تتفضل ,,

هواياتي ,,

التصوير ,, التصميم ,, القراءة ,, الطبخ ,,

والرياضة الوحيدة اللي أحب أما رسها هي السباحة وأحيانا المشي ,,

أحب الأنمي والمسلسلات والأفلام الكورية واليابانية ,,

وكل شي يتعلق بآسيا عموما ,,

شخصيتي ,,

عموما هادية ورايقة طول الوقت ,,

أحب الروقان مررة ,,

وأنا أؤمن بالمثل اللي يقول ,,

إبعد عن الشر وغنيلو ,,

مرررا ما أحب المشاكل ,,

ولا الكلام الكتير اللي مالو داعي ,,

غالبا حالي حال نفسي ,,

وأنا ماني من النوع اللي أكون صداقات بسهولة ,,

ممكن أتعرف على ناس كتير ,,

يعني مو كتير مرررة كمان ,,

بس صداقاتي تبقى على نفس الأشخاص لسنين وسنين ,,

ومن أندر النوادر إذا حاولت أتقرب من شخص معين ,,

الألوان ,,

أحب كل الألوان بلا إستثناء ,,

لكن أميل أكتر للبنكي بدرجاتو والفوشي مررا أعشقو ,,

والأحمر أحبو بس مو طول الوقت ولا في كل شي ,,

كمان أحب الألوان الفسفورية ,, أحسها ألوان مفرحة ومرحة ,,

بس أهم شي تكون بزوق حلو ,, لأنو ممكن تصير يالطيف لو جات بطريقة غلط ,,

أما اللون الموف أخاف منو ,, أحسو لون صعب ,, لأنو يا يطلع حلو مررا ,, يا مرررا شنيع ,,

الموف الفاتح أحسو بنوتي وناعم ,, والغامق أحسو لون صراحة ساحر ومميز ,,

بس أنا أكره اللون الموف في المكياج ,, عندي العيون تكون موف مرا حلو ,, لكن روج موف مرررا لأ ,,

إذا أبغى أحط روج موف ,, لازم يكون مثلا موف على بينك ولا موف على عنابي ,,

لكم موف موف نو ويييي ,, أحس شفايفي كأنها شفايف سمكة ولا مخلوق فضائي ,,

الأكل ,,

الحمدلله أنا من النوع اللي آكل كل شي تقريبا ,,

ما عدا أشياء محددة ,,

أعشق السي فود ,, خصوصا القشريات ,,

( الروبيان – الكلاماري – اللوبستر ) ,,

بس الصدف مرررا ما أحبو ,,

والفاكهة اللي ما أحبها هي الموز ,,

واللي ما أحبو من الخضار ( الباذنجان – الكوسة ) ,,

أحب كل أنواع الأكل ( الإيطالي – الصيني – التركي – المكسيكي – الأمريكي – الهندي – اللبناني ) ,,

بس ما أحب أكلات الدبايح ,,

( يعني لا مندي ولا ندي وحنيد ولا مضبي ولا أي شي ) ,,

ما أحب غير السليق الطايفي والزربيان والكابلي والكوزي ,,

وتكون بالدجاج وحقت البيت ,, ما أحب حقت المطابخ ,,

مش حكاية ما أحب اللحم ,, بالعكس أحبو ,, بس ما أحب شغل الدبايح ,,

أحب الشكولاتة والحلويات عموما ,, بس مو كتير ,,

يعني بس وقت ما أشتهيها آكل قليل ,, يعني مو من النوع اللي لازم آكل حلى وشكولاتة كل يوم ,,

أما بالنسبة للمشروبات ,,

أكيد أحب الموية ,, والعصيرات خصوصا لمن تكون فريش ماعدا الموز ,,

وأعشق الكوكا خصوصا الدايت ,, مررا ما قدرت أبطلو ,, ولا قدرت ألاقي بديل عنو بصراحة ,,

وعلى فكرة ترى ما أحب الكوفي كتير ,,

لأني بصراحة ما أحب المذاق المر ,,

ممكن مر خفيف على حلى أكتر أوكي زي الشكولاتة الغامقة ,,

لكن المذاق المر جدا زي القهوة التركي واللي زيها مررا ما أحبها ,,

أحب الشاهي الأسود ,, وأموت في الشاهي الأخضر بالنعناع ,,

ستايلي ,,

مالي ستايل محدد ,,

ستايلي ولبسي يعتمد على حسب المكان والمناسبة والوقت ,,

وهوا دا بعتباري سر الأناقة ,,

يعني كمثال ,,

للأوقات العادية وجلسات الصحبات ممكن زي كدا ,,

وللمناسبات البسيطة ,,

وللسهرات أحب الفساتين والموديلات الناعمة زي كدا ,,